يسرا تكشف سبب عدم تأجيل مهرجان الجونة

كشفت النجمة يسرا، عضو المجلس الاستشاري لمهرجان الجونة السينمائي، عن سبب عدم تأجيل الدورة المقبلة من المهرجان، بالرغم من تصاعد الأحداث في لبنان مؤخرا.

وقالت يسرا في تصريحات إعلامية: "هو الأحداث بتحصل فجأة وانت مش عارف هيحصل إيه، يعني أحداث لبنان اللي حصلت من كام يوم متقدرش تتوقع إن ده هيحصل فتلغي مهرجان أو تحط حاجة للحدث نفسه".

وأضافت يسرا: "لكن قد ما قدرنا السنة اللي فاتت إن إحنا نعبر عن الحزن بتاعنا ونعبر عن موقفنا تجاه فلسطين إحنا أجلنا كذا مرة وعملنا ده ومنقدرش نعمل ده في كل الظروف يعني ممكن وانت بتعرض يحصل ظرف تالت متعرفش إيه هو هتعمل ايه ساعتها على حسب الموقف فالحاجة الوحيدة اللي بقول أهمية الفن فيها إن الفن بيوصل وجعك للآخر بيوصل رسالتك للآخر بيوصل رسالتك للعالم فممكن تغير الرأي العام كله، من خلال حدث معين أو فيلم معين أو تجربة معينة".

وكانت يسرا وجهت كلمة للشعب اللبناني على هامش المؤتمر الصحفي الخاص بالإعلان عن تفاصيل الدورة القادمة من مهرجان الجونة السينمائي قالت فيها: "عايزة أقول للبنانيين إن قلوبنا معاهم وأنا واثقة في قوتهم، خصوصا إنهم مروا بحروب كتير في حياتهم وقدروا يثابروا".

وأضافت: "عايزة أقول لهم إنتم في قلوبنا وفي دعواتنا، ونحترم قوتكم وربنا معاكم".

يذكر أن الدورة القادمة من مهرجان الجونة السينمائي تقام في الفترة من 24 أكتوبر إلى 1 نوفمبر 2024.