منة فضالي: عيطت لما طلعت "تريند"

عبرت الفنانة منة فضالي عن سعادتها بنجاح دورها في مسلسل "كوبرا" رغم ظهورها في عدد قليل من الحلقات لكنها تصدرت "التريند" وقت عرضهم.

وقالت منة فضالي في تصريحات صحفية: "سعيدة إني اشتغلت مع محمد عادل إمام كان في بينا كيميا والناس حبيتنا أوي، وحسيت إني أعرفه من سنين وإننا اشتغلنا مع بعض قبل كده".

وكشفت منة فضالي عن تجهيزاتها لشخصية "حنان" في مسلسل "كوبرا" وقالت: "حنان شخصية جميلة وحقيقية وطيبة حاولت أنها تكون طبيعية، على الورق مش بيكون باين التفاصيل دي لازم نحط لمسات من عندنا، وأنا خليت للشخصة لزمة أنها بتتكلم بسرعة أوي".

وأكدت منة فضالي أنها فوجئت برد الفعل على الدور لدرجة أنها بكت من الفرحة قائلة: " مكنتش متوقعة التريند بس كنت مبسوطة أن أول يوم اطلع تريند والناس تتكلم عني اتفاجئت وعيطت وحسيت بالمسئولية، ومبسوطة أن جمهور محمد إمام حبوا الشغل اللي عملناه لأن كل ما تشتغلي مع نجم الناس بتحبه بتاخدي من نجاحه".

وإلى جانب مسلسل "كوبرا" تشارك منة فضالي في مسلسل "محارب" لكنها لا ترى أن هذ الدور يضيف لها وأوضحت: "مشكلة مسلسل "محارب" إن من بداية المسلسل ماخدتش ورق للشخصية، حكولي الدور في التليفون سألوني إن كان عندي مانع أظهر في دور قعيدة وأن الدور حلو، وبعدها اكتشفت أن كان في ممثلة تانية هتقدمه واعتذرت، وأحمد زاهر كلمني وطلب مني أني أقدم الدور".

وتابعت منة فضالي موضحة أنها لم تحصل على سيناريو كامل للشخصية: "طول المسلسل بصور مش معايا ورق، باخد المشهد قبل التصوير، كنت مستاءة جدا وأغلبنا كده حسيت إني مش شايفة معالم للدور، حاولت اشتغل على الشخصية على قد ما أقدر خليتها بسيطة في اللبس والشعر والمكياج، لكن لو كان معايا ورق كنت اشتغلت على الدور شوية وكان ممكن حتى اعتذر".

وأكدت منة فضالي أنها قدمت الدور لأنها كانت تريد العمل مع المخرجة شيرين عادل قائلة: "أنا عملت الدور إنقاذ للموقف وكنت عايزة اشتغل مع المخرجة شيرين عادل وبحب الحاج أحمد السبكي وقولت أعمله مجاملة".

مسلسل "كوبرا" من بطولة محمد إمام، مجدي كامل، محمود عبد المغني، محمد ثروت، أحمد فتحي، هشام إسماعيل، محمود البزاوي، مجدي كامل، أوس أوس، علاء مرسي، معتز هشام، وبمشاركة هالة فاخر، وأحمد بدير، حجاج عبد العظيم، صفاء الطوخي وآخرين، من تأليف أحمد أبو زيد، وإخرج أحمد شفيق.

مسلسل "محارب" من بطولة حسن الرداد وأحمد زاهر وناهد السباعي وماجد المصري ونرمين الفقي وتامر عبد المنعم ومحمود ياسين جونيور، تأليف محمد سيد بشير وإخراج شيرين عادل وإنتاج أحمد السبكي.